ދިވެހިރާއްޖޭގެ ޑިމޮކްރެޓިކް ނިޒާމުގެ އެންމެ މުހިންމު އެއް ތަނބަކީ ރައްޔިތުންގެ މަޖިލީހެވެ. ރައްޔިތުންގެ ފަރާތުން ޤައުމުގެ ކަންކަން ނިންމުމަށާއި، ޤާނޫނުތައް ހެދުމަށްޓަކައި އިންތިޚާބުކުރެވޭ މަންދޫބުންނަކީ ރައްޔިތުންގެ މަޖިލީހުގެ މެންބަރުންނެވެ. އިންތިޚާބު ނިމި، މަޤާމާ ޙަވާލުވުމަށްފަހު ގިނަ ފަހަރަށް އިވޭ އެންމެ ޢާންމު އެއް ޝަކުވާއަކީ "މެންބަރާ ގުޅޭތަ؟" މި ސުވާލެވެ.

ފުރަތަމަ ކަމަކަށް، ރައްޔިތުންގެ މަޖިލީހުގެ މެންބަރަކާ ރައްޔިތުންނާ ދެމެދު ގުޅުން އޮންނަން ޖެހޭނެތޯ އުފެދޭ ސުވާލަށް ބަލާއިރު، ޖަވާބަކީ އާއެކެވެ. މެންބަރަކީ ދާއިރާގެ ރައްޔިތުންގެ އަޑެވެ. ރައްޔިތުންގެ އިޙްސާސްތަކާއި، ދާއިރާއަށް ދިމާވެފައިވާ ދަތިތަކާއި، ބޭނުންވާ ތަރައްޤީގެ މަޝްރޫޢުތަކުގެ މަޢުލޫމާތު މެންބަރަށް އެނގޭނީ ރައްޔިތުންނާ ގާތް ގުޅުމެއް ބާއްވައި، ރައްޔިތުންގެ އަޑު އަހައިގެންނެވެ. އެހެންކަމުން، ރައްޔިތުންނަށް ފަސޭހައިން މެންބަރާ ގުޅޭނެ އިންތިޒާމުތައް ހަމަޖެހިފައި ހުރުމަކީ ނުހަނު ބޭނުންތެރި ކަމެކެވެ.

ދެވަނަ ކަމަކަށް، މަޖިލިސް މެންބަރު ރައްޔިތުންނަށް ފޯރުކޮށްދޭންޖެހޭ އެހީތަކަކީ ކޮބައިކަން ދެނެގަތުން މުހިންމެވެ. ގިނަ ފަހަރަށް މެންބަރުންގެ ކިބައިން އަމިއްލަ ޒާތީ ކަންކަމަށާއި ފައިސާގެ އެހީތެރިކަމަށް އެދޭ މަންޒަރު ފެނެއެވެ. ނަމަވެސް މެންބަރުންގެ އަސްލު އެހީތެރިކަމަކީ ދާއިރާގެ ޢާންމު މަޞްލަޙަތު ރައްކާތެރިކުރުމެވެ. ދާއިރާގެ ތަރައްޤީއަށް ބޭނުންވާ ބަޖެޓު ހޯދައިދިނުމަށް ވަކާލާތުކުރުމާއި، ސަރުކާރުގެ ވުޒާރާތަކުން ރައްޔިތުންނަށް ލިބެންޖެހޭ ޚިދުމަތްތައް ފަސޭހަކަމާއެކު ލިބޭނެ މަގު ފަހިކޮށްދިނުމަކީ މެންބަރުން ރައްޔިތުންނަށް ވެދޭންޖެހޭ އެންމެ ބޮޑު އެހީތެރިކަމެވެ.

ތިންވަނަ ކަމަކަށް، މެންބަރުން އެމީހުންގެ ޤާނޫނީ ޒިންމާ އަދާކުރޭތޯ ބަލާއިރު، މިކަމުގައި ތަފާތު މަންޒަރުތައް ފެނެއެވެ. ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން މެންބަރުންނާ މަތިކޮށްފައިވާ މައިގަނޑު ޒިންމާތަކަކީ ޤާނޫނު ހެދުމާއި، ދަޢުލަތުގެ ބަޖެޓު ފާސްކުރުމާއި، ސަރުކާރު ޖަވާބުދާރީ ކުރުވުމެވެ. ބައެއް މެންބަރުން މި ޒިންމާތައް ފުރިހަމައަށް އަދާކުރައްވާއިރު، އަނެއްބައި މެންބަރުން ޕާޓީގެ މަޞްލަޙަތު އިސްކޮށް، ޤައުމީ އަދި ދާއިރާގެ މަޞްލަޙަތު ދޫކޮށްލާ ތަން ފެނެއެވެ. މިއީ މެންބަރުންގެ ޤާނޫނީ ޒިންމާއާމެދު ސުވާލު އުފެދޭ މައިގަނޑު ސަބަބެވެ.

އެހެންކަމުން، މެންބަރަކު އެމީހެއްގެ ޒިންމާ އަދާނުކޮށްފިނަމަ ރައްޔިތުންނަށް ކުރެވޭނީ ކޮން ކަމެއް ހެއްޔެވެ؟ އެންމެ ފުރަތަމަ ކަމަކީ، ޤާނޫނީ އިމުގެ ތެރެއިން މެންބަރު ޖަވާބުދާރީ ކުރުވުމެވެ. ސޯޝަލް މީޑިއާ އާއި އެކި ބައްދަލުވުންތަކުގެ ޒަރީޢާއިން ކަންބޮޑުވުންތައް ފާޅުކުރުމެވެ. ދެވަނަ ކަމަކީ، ޕެޓިޝަން ހުށަހެޅުމާއި، ޢާންމު މަސްލަޙަތު ހުރި ކަންކަމުގައި އަޑުއުފުލުމެވެ. އަދި އެންމެ މުހިންމު ކަމަކީ، ރައްޔިތުންނަށް ލިބިފައިވާ ވޯޓުގެ ބާރުގެ ބޭނުން ހެޔޮގޮތުގައި ހިފުމެވެ. ޒިންމާދާރުކަން ކުޑަ، ރައްޔިތުންނާ ގުޅުން ނުބާއްވާ މެންބަރުންނަށް ދެވަނަ ފަހަރަށް ވޯޓު ނުދީ، ޤާބިލު އިޚްލާޞްތެރި ފަރާތްތައް އިންތިޚާބު ކުރުމަކީ ރައްޔިތުންގެ އަތުގައި އޮތް އެންމެ ވަރުގަދަ ބާރެވެ.

ޚުލާޞާކޮށް ދަންނަވާނަމަ، މަޖިލިސް މެންބަރަކީ ރައްޔިތުންގެ ޚާދިމެކެވެ. މެންބަރާ ގުޅެންޖެހޭނެއެވެ. އަދި މެންބަރުން އެމީހުންގެ ޤާނޫނީ ޒިންމާ އަދާކުރަންވެސް ޖެހޭނެއެވެ. ރައްޔިތުން ހޭލުންތެރިވެ، ޒާތީ މަންފާއަށްވުރެ ޤައުމީ މަޞްލަޙަތު އިސްކޮށްގެން މެންބަރުން ޖަވާބުދާރީ ކުރުވުމަކީ ޤައުމުގެ ކުރިމަގު އުޖާލާކުރުމަށްޓަކައި ކޮންމެހެން ކުރަންޖެހިފައިވާ ކަމެކެވެ

"ރައްޔިތުންގެ މަޖިލީހުގެ މެންބަރާއި ގުޅޭތަ؟" މި ސުވާލުގެ ޙަޤީޤީ ޖަވާބު ގުޅިފައިވަނީ އިންތިޚާބުގެ ތާރީޚާއެވެ. އިންތިޚާބު ކައިރިވެފައިވާނަމަ ނުހަނު ފަސޭހައިން ގުޅެއެވެ. އިންތިޚާބު ނިމި ދައުރުގެ މެދުތެރޭގައިނަމަ ގުޅުމަކީ ނުހަނު ދަތި ކަމެކެވެ. ނަމަވެސް، ޙަޤީޤީ ޑިމޮކްރަސީއެއް ހަރުދަނާކުރެވޭނީ، އިންތިޚާބު އޮންނަ ދުވަސްވަރެކޭ އެއްފަދައިން، މުޅި 5 އަހަރުގެ ދައުރުގައިވެސް މެންބަރާއި ރައްޔިތުންގެ ގުޅުން އެއްގޮތެއްގައި ދަމަހައްޓައި، ރައްޔިތުންނަށް ދިމާވާ ކަންކަމުގައި މެންބަރާ ސީދާ ވާހަކަދެއްކޭނެ މަގުތައް ފަހިވެގެންނެވެ.

ދިވެހި ސަރުކާރާއި އީގަލް ހިލްސް ކުންފުންޏާ ދެމެދު ވެފައިވާ އެއްބަސްވުމުގެ ތަފްސީލުތަކަށް އެދި